ЕТС Қазақстанның тауар биржалары нарығында көшбасшылығын сақтап отыр

2025 жылғы қаңтар–тамыз қорытындысы бойынша Қазақстандағы тауар биржаларындағы мәмілелер көлемі 1,1 трлн теңгеден асты. Нарықтың тұрақты көшбасшысы – «Еуразиялық Сауда Жүйесі» тауар биржасы» АҚ (ЕТС), оның үлесіне 470 млрд теңге немесе елдегі барлық биржалық айналымның 42%-ы тиесілі. Айта кетейік, Қазақстанда тауар биржалары қызметіне тоғыз лицензия берілген.

Сегіз айдың қорытындысы бойынша екінші орында – «Эстау» тауар биржасы» АҚ, мәмілелер көлемі 231 млрд теңге (21%). Үшінші орында – «Каспий» тауар биржасы» АҚ, мәмілелер көлемі 187 млрд теңге (17%).

Тамыз айының қорытындысы бойынша да ЕТС көшбасшылықты сақтады: өткен айда оның алаңындағы мәмілелер көлемі 77 млрд теңгені құрап, барлық сауданың 55%-ын қамтамасыз етті. Екінші орында – «Жібек жолы» тауар биржасы» АҚ (37 млрд теңге, 27%), үшінші орында – «Каспий» тауар биржасы» АҚ (25 млрд теңге, 18%).

Осылайша, ЕТС сегіз ай қорытындысында да, тамыз айында да нарықтағы негізгі үлесті ұстап тұр. Сарапшылардың пікірінше, бұл ең ірі ойыншының тұрақтылығын және саудаға қатысушылар тарапынан сенімнің жоғары деңгейін дәлелдейді.

Қазақстанда тауар биржалары қызметіне 9 лицензия берілгенімен, іс жүзінде тек үш алаң белсенді жұмыс істейді.
________________________________________

ЕТС туралы

«Еуразиялық сауда жүйесі» тауар биржасы» АҚ (ЕТС) – Қазақстандағы ең ірі сауда алаңдарының бірі, 2009 жылдан бері жұмыс істейді. Биржа 100 жылдан астам деректерді мұрағаттауға мүмкіндік беретін бірегей бағдарламалық қамтамасыз етуді қолданады, бұл мәмілелердің ашықтығын, кепілдігін және сауданың қауіпсіздігін қамтамасыз етеді.
ЕТС тобы халықаралық қатысуын белсенді түрде кеңейтіп келеді. 2024 жылы биржа экспорттық сауда платформасы ETSE құруға лицензия алды. Бұл платформа экспорттық-импорттық операциялар мен валюта саудасын дамытуға бағытталған және ұйымдасқан тауар нарығын қалыптастыруда, халықаралық сауда инфрақұрылымын жетілдіруде маңызды құрал болмақ.