ЕТС ЕАЭО тауар нарықтарының халықаралық биржалық индикаторларын жариялай бастады

«Еуразиялық сауда жүйесі» тауар биржасы» АҚ (ЕТС) Қазақстан нарығына алғаш рет Еуразиялық экономикалық одақ (ЕАЭО) елдері мен көршілес мемлекеттердің биржалары бірлесіп әзірлеген Тауар нарықтарының халықаралық индикаторлар жүйесінің мәліметтерін ұсынады. Деректер тұрақты түрде жарияланып отырады.

Жобаның бастамашысы – IT-платформаны ұсынған Санкт-Петербург биржасы. Әзірлеуге сондай-ақ Беларусь әмбебап тауар биржасы (БУТБ), «Қырғыз қор биржасы» ЖАҚ (ҚҚБ) және Өзбекстан республикалық тауар-шикізат биржасы қатысты. Қазақстанда индикатор деректерін өз платформасында жариялап отырған жалғыз биржа – ЕТС.

Алғашқы кезеңде мұнай өнімдері, сұйытылған көмірсутек газы, сығылған табиғи газ, металдар, ағаш материалдары, көмір, астық және майлы дақылдар бойынша индикаторлар ұсынылды. Алдағы уақытта тізімді минералды тыңайтқыштар мен полимерлер есебінен кеңейту жоспарланып отыр.

«Халықаралық индикаторлар жүйесін құру – өңір биржаларының көпжылдық бірлескен жұмысының нәтижесі. Ол ашық әдіснамаға және нақты мәмілелерге негізделген, бұл деректердің сенімділігі мен объективтілігін қамтамасыз етеді. Бизнес үшін бұл – жоспарлау мен инвестициялық шешім қабылдаудың жаңа деңгейі», — деп атап өтті «ЕТС» АҚ басқарма төрағасы Құрмет Оразаев.

Оның айтуынша, индикаторлар тек трейдерлер мен реттеуші органдарға ғана емес, сонымен қатар экономикалық қызметке қатысушылардың кең ауқымына да пайдалы болады:

«Біздің міндетіміз – тек деректерді жариялау емес, өңірлік нарықтың цифрлық айнасын қалыптастыру. Индикаторларға тұрақты қолжетімділік нарық қатысушылары мен мемлекеттік органдарға өзгерістерге жедел әрекет етуге және тауар нарықтарында теңгерімді қамтамасыз етуге мүмкіндік береді. Бұл биржалық саудаға сенімді күшейтеді, трансшекаралық сауданы ынталандырады және ЕАЭО елдерінің әрі қарай интеграциясына ықпал етеді».

Естеріңізге сала кетейік, халықаралық индикаторлар жүйесін құру идеясы 2024 жылдан бері талқыланып келеді. Сол жылы Қазақстан, Беларусь, Өзбекстан, Қырғызстан және Ресей биржалары баға ақпаратын алмасу және ынтымақтастық туралы келісімге қол қойған болатын. 2025 жылғы наурызда Алматыдағы ЕТС алаңында жұмыс тобының отырысы өтіп, тауарлардың базалық тізімі келісілді және индикаторларды жариялайтын бірыңғай ресурс құру туралы шешім қабылданды. Бүгінгі іске қосу – осы жұмыстың нақты нәтижесі әрі ЕАЭО ішіндегі интеграциялық үдерістердің жаңа кезеңі.

Санкт-Петербург биржасы туралы

Санкт-Петербург биржасы – Ресейдегі ең ірі тауар биржасы. Ол мұнай өнімдері, мұнай, мұнай химиясы, табиғи газ, СКГ, металдар, ағаш және құрылыс материалдары, минералды тыңайтқыштар мен ауыл шаруашылық тауарлары нарықтарында, сондай-ақ туынды құралдар нарығында биржалық сауда ұйымдастырады. Ресей ішкі нарығына жеткізілетін негізгі мұнай өнімдерінің төрттен бірі осы Биржада саудаланады. Санкт-Петербург биржасы ресейлік тауарларға әділ баға қалыптастырудың ашық механизмін жасайды. Биржа 2008 жылғы мамырда құрылған. Акционерлері – Ресейдің жетекші мұнай-газ компаниялары.

ЕТС туралы

«Еуразиялық сауда жүйесі» тауар биржасы» АҚ (ЕТС) – Қазақстандағы ең ірі сауда алаңдарының бірі, 2009 жылдан бері жұмыс істейді. Биржа 100 жылдан астам деректерді мұрағаттауға мүмкіндік беретін бірегей бағдарламалық жасақтаманы пайдаланады. Бұл мәмілелердің жоғары деңгейдегі ашықтығын, кепілдігін және сауданың қауіпсіздігін қамтамасыз етеді.

ЕТС тобы халықаралық қатысуын белсенді кеңейтуде. 2024 жылы Биржа экспорттық-импорттық операциялар мен валюталық мәмілелерді дамытуға бағытталған ETSE экспорттық сауда платформасын құруға лицензия алды. Бұл платформа ұйымдасқан тауар нарығын қалыптастыруда және халықаралық сауда инфрақұрылымын дамытуда маңызды құралға айналмақ.